🌟पुर्णा नगर परिषद निवडणूक निकाल एकोणीस दिवसांनी : उमेदवारांच्या मनात शंकेची पाल चुकचुकतेय....!

🌟ईव्हीएम मशिनींच्या सुरक्षेवर प्रश्नचिन्ह ? ईव्हीएमचा घोळ तर होणार नाही ना ? प्रश्नाने अनेकांची धाकधूक वाढली🌟

पुर्णा (विशेष वृत्त) - पुर्णा नगर परिषद सार्वत्रिक निवडणूक २०२५ अंतर्गत जनमतातून नगराध्यक्ष पदासह शहरातील अकरा प्रभागातील २३ नगरसेवक पदांची निवडणूक सर्व सोपस्कार पुर्ण करीत दि.०२ डिसेंबर २०२५ रोजी मतदान प्रक्रियेतून कशीबशी पार पडली तत्पूर्वी राज्य निवडणूक आयोगाचे दिनांक २९ नोव्हेंबर २०२५ रोजीच्या आदेशानुसार प्रभाग क्रमांक ०१ मधील 'ब' व प्रभाग क्रमांक १० मधील 'ब' या दोन जागांच्या निवडणूकीला स्थगिती दिली त्यामुळे या प्रभागातील या जागांवर निवडणूक लढणाऱ्या उमेदवारांच्या अपेक्षा भंग झाल्या त्यातच नगराध्यक्ष पदासह अकरा प्रभागांतील उर्वरित २१ जागांसाठी काल मंगळवार दि.०२ डिसेंबर २०२५ रोजी मतदान प्रक्रिया पार पडली निवडणूक आयोगाने ठरविल्याप्रमाणे निकाल आज बुधवार दि.०३ डिसेंबर रोजी लागणे अपेक्षित होते परंतु मुंबई उच्च न्यायालयाच्या नागपूर खंडपीठाने राज्यातील स्थानिक स्वराज्य संस्था अर्थात नगर परिषद निवडणुकीच्या आजच्या निकालाला स्थगिती देऊन सदरील निकाल दि.२१ डिसेंबर २०२५ लावण्याचे राज्य निवडणूक आयोगाला निर्देश दिल्याने तब्बल चार वर्षांच्या प्रदिर्घ कालावधी नंतर लागलेल्या नगर परिषद/नगर पंचायत निवडणुकांची अवस्था 'नकटीचे लग्न अन् सतराशे विघ्न' अशी झाल्याचे पाहावयास मिळत आहे.

पुर्णा नगर परिषद नगराध्यक्ष व नगरसेवक पदांचे निकाल आज ३ डिसेंबर २०२५ ऐवजी दि.२१ डिसेंबर २०२५ रोजी १९ दिवसांच्या प्रदिर्घ कालावधी नंतर लागणार असल्याचे निर्देश राज्य निवडणूक आयोगाकडून प्राप्त झाल्यानंतर नगराध्यक्ष पदांची निवडणूक लढणाऱ्या १४ उमेदवारांसह अकरा प्रभागांतून नगरसेवक पदांची निवडणूक लढवणाऱ्या तब्बल ११० उमेदवारांची धाकधूकी वाढली असल्याचे पाहावयास मिळत आहे अनेकांच्या मनात अक्षरशः शंकेची पाल चुकचुकत असून ईव्हीएम मशीनींच्या सुरक्षेवर देखील अनेकांनी प्रश्नचिन्ह निर्माण केला असून यात राज्यातील सत्ताधारी महायुतीतील घटक पक्षांतील उमेदवार वगळता विरोधी पक्षांतील जवळपास सर्वच उमेदवारांची चिंता वाढल्याचे निदर्शनास येत असून या उमेदवारांमध्ये ईव्हीएम मशिनींच्या सुरक्षेवर देखील प्रश्नचिन्ह ? निर्माण केला जात असल्याचे देखील बोलले जात असून ईव्हीएमचा घोळ तर होणार नाही ना ? अशा शंका कुशंका देखील व्यक्त केल्या जात आहेत.

पुर्णा नगर परिषदेच्या नगराध्यक्ष पदासह एकवीस नगरसेवक पदांसाठी झालेल्या या निवडणूकीच्या २१ डिसेंबर २०२५ रोजी येणाऱ्या निकालाविषयी संशय जरी व्यक्त केला जात असला तरी या निकालाची प्रतिक्षा अजून अठरा दिवसांपर्यंत करावी लागणार आहे या निवडणुकीत ज्या उमेदवारांनी आपले सर्वस्व पणाला लावले होते त्या उमेदवारांच्या काळजाचे ठोके चांगलेच वाढल्याचे पाहावयास मिळत आहे दरम्यान काल मंगळवारी झालेल्या मतदान प्रक्रियेनंतर नगराध्यक्ष पदाच्या चौदा उमेदवारांसह नगरसेवक पदांच्या ११० उमेदवारांचे भविष्य मतपेटीत बंद झाले आहे आगामी २१ डिसेंबर रोजी लागणाऱ्या निकालाकडे संबंधित उमेदवारांसह सर्वसामान्य मतदार जनतेचे देखील लक्ष लागले आहे.........